Bola 1 oyligida quyidagilarni qila oladi:

• mikroharakatlarni amalga oshiradi va gapiruvchining gap ohangiga mos tovushlar chiqaradi;
• ranglar (qizil, sariq, qora va oq), chiziqlar va kataklarni ajrata oladi;
• unga engashib turgan kishining yuziga nigohini qadaydi;
• tovushlarning o‘ziga xosligini ajratadi;
• onasini ovozidan, hididan, qo‘li tegishidan taniydi;
• qimirlamay turgan buyumga nigohini qadaydi va u tekis siljigan taqdirda, uni nigohi bilan kuzata oladi;
• qornida yotib, ko‘tarilishga va boshini tutib turishga urinadi.

2 oyligida:

• ovoz yoki engashgan yuzga javoban tabassum qiladi;
• harakatlanayotgan va harakatdan to‘xtagan buyumga nigohini qadaydi va uni ko‘rish maydonida tutib turadi;
• tovush kelgan tomonga boshini buradi va uni ko‘zi bilan qidiradi;
• u bilan qilgan muloqotga javoban, tetiklanib ketadi;
• qornida yotib, boshini tutib turishga intiladi;
• unli tovushlarga urg‘u bergan holda ovoz chiqaradi;
• yonboshidan orqasiga ag‘anaydi.

3 oyligida:

• onasi va otasining yuzlarini taniydi, u bilan muloqot qilishganida kuladi;
• injiqlanadi, zorlanib yig‘laydi, norozi ohangda baqiradi;
• g‘ovur-g‘uvur, g‘uv-g‘uv ovoz chiqaradi, kattalar bilan suhbat qiladi;
• karavotcha tepasiga osib qo‘yilgan o‘yinchoqlarga qo‘lini olib bora oladi;
• o‘yinchoqni tutib oladi va og‘ziga olib boradi;
• qornida yotib bilaklariga tayangan holda boshini ko‘tarib turadi;
• chalqancha yotgan holda yonboshiga ag‘anaydi;
• qo‘ltig‘idan tutib turilganida qattiq yuzaga oyoqchalari bilan tiralib turadi;
• boshini tutib turadi va uni boshqara oladi;
• tovush va yorug‘lik manbasini topa oladi.

4 oyligida:

• onasini (yoki uni doimiy ravishda parvarish qiladigan kishini) taniydi va uni boshqalardan afzal ko‘radi;
• tanish kishilar ovozlarini notanishlarnikidan ajrata oladi;
• pishillaydi, ilk bo‘g‘inlarni talaffuz qiladi;
• osilib turgan o‘yinchoqlarni bir qo‘li yoki bir paytning o‘zida ikkala qo‘li bilan ham ushlay oladi;
• o‘z ismini taniydi va uni chaqirishganida qayrilib qaraydi;
• chalqancha yotgan holda yelkasini va boshini ko‘taradi;
• tanish va notanish narsalarga turlicha reaksiya ko‘rsatadi;
• “sevimli” va “xush ko‘rmaydigan” o‘yinchoqlarini ajratadi.

5 oyligida:

• rasmlardagi yuzlarni jon-dili bilan tomosha qiladi;
• ohangdorlik bilan g‘ovur-g‘uvur ovozlar chiqaradi, bijir-bijir gaplarga o‘ta boshlaydi;
• buyumlarni tutib oladi, ushlab turadi, paypaslaydi, o‘ziga tortadi, otib yuboradi;
• tanish va notanish kishilar yuzlarini ajratadi;
• begonalarga nisbatan hushyorlik bilan munosabatda bo‘ladi;
• mustaqil tarzda 5—10 daqiqa o‘yinchoqlari bilan band bo‘ladi;
• chalqancha yotgan holda qorniga ag‘darilib oladi, qo‘llariga tayanadi, o‘tirishga harakat qiladi;
• qornida yotib, kaftlariga tayanadi va qo‘lini tik qiladi;
• “ku-ku” deb o‘ynaydi, ovutishlar ohangiga mos tarzda g‘uldiraydi.

6 oyligida:

• o‘zi eshitgan eshitgan ovozlarga javoban g‘ulduraydi va ularga taqlid qiladi;
• gapga diqqat bilan quloq soladi;
• siz gapirayotgan buyumlarni nigohi bilan izlab topadi;
• begonalar bilan ma’lum masofani saqlaydi;
• o‘yinchoqlarini bir qo‘lidan ikkinchisiga oladi;
• tutib olgan narsasini otadi, o‘yinchoqni ipidan tezgina tortadi;
• buyumlarni bir idishdan ikkinchisiga soladi;
• cho‘zilgan qo‘lidan 10—20 sm uzoqlikdagi o‘yinchoqqa qarab sudralib boradi;
• biror narsaga tayanib, o‘rnidan turishga o‘rganadi.