“Ya Happy Mama” nashri bolalar bilan sartarosh o‘yinini o‘ynab, shu bilan bir vaqtda qaychidan foydalanishni o‘rganish usulini ko‘rsatib berdi.

Buning uchun bizga:

• oq va rangli qog‘ozlar;
• karton;
• flomasterlar;
• qaychi;
• yelim kerak bo‘ladi.

Dastlab, kartonga odam yuzlarini chizamiz va ularni kesib olamiz. Endi esa rangli qog‘ozlardan soch, mo‘ylov va soqollar qirqib, ularga yopishtiramiz. Bu jarayonda fantaziyani ishga solish zarur.

Endi o‘yinni boshlash mumkin. Farzandingiz sartaroshlik vazifasini bajarsin, uning qabuliga turli mijozlar kelsin. Kimningdir sochini, kimningdir soqolini kesish kerak. Qaychidan foydalanib, “mijozlarga xizmat ko‘rsatish”ni bolaning o‘ziga qo‘yib bering.

Shunchaki qog‘oz kesishdan ko‘ra, rolli o‘yin o‘ynash bolalar uchun albatta qiziqroq bo‘ladi. Buning uchun siz “mijozlar” nomidan gapirib, bola bilan muloqot qiling.