Barchamiz farzandlarimizning sog‘lom bo‘lishini istaymiz. Shunday ekan, o‘sayotgan organizmga birinchi navbatda nima kerak bo‘ladi? Albatta to‘g‘ri ovqatlanish! Maktab yoshidagi bolalar uchun sog‘lom ovqatlanish tarzi nimalarni o‘z ichiga oladi? Bunda qanday qoidalarga amal qilish zarur? Maqolada ushbu savollarga javob topishingiz mumkin.
Maktab yoshidagi bola uchun sabzavotlar tarkibidagi klechatka, mevalar tarkibida mavjud vitaminlar va makroelementlar, go‘sht mahsulotlaridagi oqsil, baliqda juda mo‘l bo‘lgan fosfor, sut mahsulotlarida mavjud kalsiy juda zarur hisoblanadi. Bolaning ratsioni bir me’yorga keltirilgan va zarur miqdordagi oqsil, yog‘lar, uglevodlar, vitaminlar va aminokislotalarni o‘z ichiga olishi zarur.
Yosh bolalarning ovqat hazm qilish tizimi o‘ziga xos bo‘lganligi uchun ular yog‘li, qovurilgan, achchiq va nordon ovqatlarni yeyishdan cheklanishi kerak. Bolalar ovqatlanish tizimining asosini xom mahsulotlar (sabzavotlar, meva va ko‘katlar) hamda qaynatilgan va dimlangan taomlar tashkil etishi lozim. Shirin ichimliklar, pishiriqlar, xamir mahsulotlari, shokolad kabilar minimal miqdorda iste’mol qilinishi zarur.
Agar farzandingizning sog‘lig‘ini asrashni istasangiz, uning fastfud mahsulotlari, gazlangan shirin suv, qotirilgan non va chipsi, shuningdek, tarkibida kimyoviy va rang beruvchi qo‘shimchalar mavjud mahsulotlarni tanovvul qilishiga ruxsat bermang.
Bolaning sog‘lom ovqatlanish tarzini qanday tashkil etish lozim?
Quyida maktab o‘quvchilarining sog‘lom ovqatlanish tarziga oid asosiy qoidalarni keltiramiz:
- Turli-tumanlik
Aniq o‘ylab chiqilgan, turli zarur mahsulotlarni o‘z ichiga oluvchi muvozanatlashtirilgan ovqatlanish tarzi.
- Tartib va davriylik
Kuniga 4 martadan kam bo‘lmagan va har kuni belgilangan bir vaqtda ovqatlanish. Ular orasidagi tanaffus 3,5 soatdan oshib ketmasligi lozim.
- Har kuni yangi uzilgan meva va sabzavotlarni iste’mol qilish
Meva va sabzavotlar salatlarda, qirg‘ichdan chiqarilgan holda, sharbat ko‘rinishida va albatta butunligicha iste’mol qilinishi mumkin.
- Tuz va shakar, gazli ichimliklarni minimum darajagacha cheklash
Ushbu mahsulotlar organizmdagi suv va tuz balansini buzish, ovqat hazm qilish hamda immun tizimini ishdan chiqarish, shuningdek, semirib ketish kabi yoqimsiz oqibatlarga olib kelishi mumkin.
- Taomlarni tayyorlash usuli - bug‘da tayyorlash, dimlab va qaynatib pishirish
Bolalarning ratsioniga quruq mevalarni ham kiritish ayni muddao hisoblanadi.
Maqolani tayyorlashda “Razvitiye detey” sayti ma’lumotlaridan foydalanildi.
