Uolt Disney kinokompaniyasining “O‘rdaklar sarguzashtlari” multfilmidagi bosh qahramonlardan biri Skruj Makdakka ovoz bergan AQShlik mashhur aktyor Alan Yang 97 yoshida  vafot etdi. Bu haqda TASS xabar bermoqda, deb Qalampir.Uz yozmoqda.

Ma’lumotlarga ko‘ra, aktyor bir necha kun avval, 19 may kuni Beverli-Xillzdagi uyida olamdan o‘tgan.

Yang ko‘pchilikning sevimli mult qahramoniga aylangan Makdakka 1974 yildan buyon ovoz berib kelgan. Aktyor Uolt Disney multfilmlaridan tashqari u bir qator filmlardagi qahramonlarga ham ovoz bergan. Ular qatoriga “Alisa oyna ortida”, “O‘rgimchak odam va uning ajoyib do‘stlari”, “G‘aroyib Xalk”, “Betmen”, “Smurflar” kabi filmlarni kiritish mumkin. Yangning 1960 yillardagi “Janob Ed” komedik filmidagi roli  unga katta mashhurlik olib kelgan edi.