Bolaning bo‘yi qancha bo‘lishi birinchi navbatda irsiyatga bog‘liq, lekin ba’zi tabiiy yo‘llar bilan bolaning bo‘yini balandroq bo‘lishiga erishish mumkin. Bu haqda Janubiy Koreya mutaxassislarining ma’lumoti:

Bolaning bo‘yi o‘sishiga uch omil bilan ta’sir qilsa bo‘ladi:

1-omil - Ovqatlanish.

Oqsilga boy mahsulotlar (qizil go‘sht, tuxum va boshqalar), yashil rangdagi sabzavotlar va kalsiy moddasiga boy mahsulotlar(sut va sut mahsulotlari, qatiq va qatiq mahsulotlari, pishloq va hokazo) bolaning bo‘yi o‘sishiga ijobiy ta’sir ko‘rsatadi. Bolaning kundalik ratsionida ushbu mahsulotlar bo‘lishi shart.

2-omil - Uxlash.

Albatta har bir bola uxlaydi, lekin bo‘y o‘sishi uchun shunchaki uxlash emas, balki chuqur uyquda bo‘lish kerak. Uyqu 4 fazadan iborat bo‘lib, tun mobaynida bu fazalar o‘rin almashadi. Ushbu fazalardan biri chuqur uyqu fazasi bo‘lib, shu davrda bo‘y o‘sishi uchun javob beradigan bez faoliyati tezlashib bo‘yni o‘stiradigan gormon yaxshi ishlab chiqariladi. Natijada bolaning bo‘yi o‘sadi. Shuning uchun bolaga chuqur uyquda bo‘lish uchun sharoit yaratib berish kerak. Kun mobaynida jismoniy aktivlik bunga asqotadi. Kompyuter o‘yinlarini o‘ynash, televizor ko‘rish kabi mashg‘ulotlar chuqur uyquda bo‘lishga to‘sqinlik qiladi.

3-omil - Jismoniy mashg‘ulotlar.

Har bir jismoniy mashg‘ulot ham bo‘yni o‘sishiga ta’sir qilmaydi. Lekin jismoniy mashg‘ulotlar yeyilayotgan kalsiy moddasini bola organizmiga singishiga yordam berishi haqida unutmaslik kerak. Bo‘y o‘stirish uchun eng kerakli mashg‘ulotlar - bu prigalkada sakrash, batutda sakrash va basketbol o‘yinidir. Haftada kamida 5 kun, kamida 30 daqiqa davomida ushbu mashg‘ulotlarni bajarish baland bo‘yga ega bo‘lishga yordam beradi.

Maqola yoqqan bo‘lsa, do‘stlaringiz bilan bo‘lishing!

Manba: Uzbaby.uz