"Yulduzcha" bolalar vokal televizion tanlovining ilk mavsumi "Navo" hamda "Bolajon" telekanallari orqali namoyish etiladi.

Tanlovning birinchi efirini 15 oktyabr kuni "Navo" telekanalida soat 18:00 da, 16 oktyabr kuni esa "Bolajon" telekanali orqali soat 10:00 da takroran tomosha qilish mumkin.

"Yulduzcha" shou-tanlovi ishtirokchilari butun respublika bo‘ylab saralab olingan eng iqtidorli, noodatiy vokalga ega bolalardir. Ular estrada, akademik va an’anaviy yo‘nalishlarda qo‘shiq kuylaydilar.

Tanlovda 6 yoshdan 14 yoshgacha bo‘lgan bolalar qatnashadi.

"Yulduzcha" loyihasi ishtirokchilar o‘zlarining qo‘shiq kuylash mahoratini hakamlar oldida namoyish etadigan shunchaki bellashuv emas, tanlov yosh iqtidor egalariga o‘zlarini ko‘rsatish, ko‘p millionli tomoshabinlar oldiga chiqishga ham imkon beradi.

Tanlov tashkilotchilari: Yoshlar tashabbuslari markazi, "Kamolot" YoIH, O‘zbekiston MTRK, Madaniyat va sport ishlari vazirligi, "O‘zbeknavo" EB va Xalq ta’limi vazirligi.