13-15 октябрь кунлари Озарбойжон пойтахти Боку шаҳрида VIII – болалар “Муғом” фестивали бўлиб ўтди. 9 мамлакатдан ташриф буюрган ёш иқтидорлар орасида марғилонлик қўшиқчи қизалоқ Розияхон Комилжонова ҳам иштирок этиб, 1-ўринни қўлга киритгани жуда қувонарлидир.

Ёдингизда бўлса ёш қўшиқчи қиз Розияхоннинг Ўзбекистон халқ артисти Озодбек Назарбеков билан шу йилнинг май ойида “Жон Ўзбекистон” қўшиғини жонли тарзда куйлагани Youtube’даги видеолавҳа орқали жуда машҳур бўлиб кетган эди.

Марғилон шаҳридаги 8 умумтаълим мактаби таълим олаётган ҳамда 8-мусиқа ва санъат мактаби тарбияланувчиси Розияхон фестивалда миллий дурдоналаримиздан бўлган “Ёр истаб” қўшиғини куйлаб, ҳакамлар ҳайъати ва томошабинларнинг олқишига сазовор бўлди.

-Ўзбек қўшиқчилик санъати дунёда ўз ўрнига эга, Розияхон томонидан айтилган юксак даражадаги ижро ташкилотчилар ва мусиқа шинавандаларида катта таассурот қолдирди,- дейди унинг устози Дониёрбек Нурматов.